مدونــة البحـــر
الجمعة، ٣٠ مايو ٢٠٠٨
قول ماعرفش ... ابوس ايدك 1/2
" يا عم ارحمنا بقى ... قول ما عرفش أبوس ايدك ... مش حرام ولا عيب والله إنك تقول ماعرفش"
صاح أحد أصدقاتنا بهذا الكلام ، موجهه إلى صديق آخر ، وأردف مكملاً:
" أنا كنت بأسالك عشان امتحنك بس ، أنا كنت عارف ومتأكد إنك ماتعرفش حاجة عن الموضوع ده ، ولكن بتفتي في كل حاجة سواء كنت عارف وغالباً بتكون مش عارف حاجة خالص"
تذكرت الموقف السابق عندما كنت اتمشى مع صديقي الغالي ابن الأزهر ، وكنا نتحدث عن التدوين واخباره ، عندما وجهت له سؤال فرد علي " لا اعلم "
احترمت هذه الكلمة جداً ، واحترمت موقفه وصراحته الشجاعة - وإن كنت لم افصح له عن ذلك حينها-
احترمت نطقه بهذه الكلمة الجريئة ، والتى يعتبرها الجهلة من الكلمات المُعيبة
كان حديثنا يدور حول كتابات ومقالات بعض المدونين ، ومنهم إحدى المدونات - بكسر الواو - ، والتى لها العديد من التدوينات والكتابات الجميلة ، وتكتب تحت أسم " عاشقة الجوزاء " ، فسألته عن معنى كلمة الجوزاء فرد على بالكلمة الجريئة " لا أعلم "
كبر الموضوع في دماغي ، قلت أعمل إستبيان صغير في نطاق الأصدقاء المقربين عن هذا الموضوع ، وكانت النتيجة مدهشة كما كنا أتوقعها
معظم الأصدقاء والذين أحترمهم وأحترم أفكارهم وعقليتهم الجميلة أجابوا بأنهم لا يعلمون - لأنها بصراحة كلمة صعبة وغير متداولة - ، ومنهم من قال " الجوزاء " برج من الأبراج - وهي معلومة صحيحة - ، ولكنهم لم يفتوا بجهل ، ولم يُحرجوا من الإعتراف بجهل معنى هذه الكلمة الصغيرة
على النقيض ... كان الأصدقاء المعرفون بثقافتهم المحدودة ، تجدهم يفتون وبطريقة غريبة تصل لدرجة السذاجة ، فمنهم من يعتقد أنها من تـُـكثر من أكل جوز الهند !!! ، ومنهم من يظن أنها المرأة الكثيرة الزواج فيطلق عليها جوزاء !!! ، وغيرها من الإجابات المضحكة
مش عيب خالص إن الإنسان يكون جاهل بمعلومة معينة أو موضوع مشهور أو مكان معروف ، ولكن العيب - والحرام كمان - إنه يفتي في موضوع ليس له به أي علم أو معرفة على الإطلاق
*********************
في إنتظار الجزء الثاني من هذه التدوينة بعد إنتهاء فترة الإمتحانات ... تقريباً كمان 3 أشهر ونصف ... يا مسهل الحال ياااااا رب
******************
في الإنتظار ... التدوينة الاخيرة ...البيات الصيفي
25 Comments:
السلام عليكم ورحمة الله وبركاته ...
فعلا يا أحمد مش كون الإنسان يجهل شىء إنه أصبح جاهل
فيها إيه لو انتا قولت مش عارف ؟؟
الإنسان معندهوش علم الأرض كله
والإسلام قال إن كلمة لا أعلم تعتبر فتوى
شكراا ليك يا حبيبى على البوست دا
أخوك
بارك الله فيك ولي تدوينة في هذا الموضوع بعنوان
مانا عارف
السلام عليكم ورحمه الله وبركاته
جزاكم الله خيرا وبوركتم اخانا الكريم
ذكرتنى بالشخص الذى كانوا اذا سالوه عن اى شىء اجاب حتى اتفقوا بليل ان يخترعوا كلمه وهميه ويسالوه فعناه فاجبهم ايضا
هو كذا كذا وقال فيه الشعراء كذا وكذا وعنه قيل كذا وقال فيه رسول الله ولسه هيكمل انهال عليه من حوله ضربا قالين له كذبت علينا افاستكذب على رسول الله ؟؟
ههههههههههههههههه
القصه بالمعنى وليست كما رويت
وفقكم الله فى امتحانكم وبوركتم
ايه يا عم أحمد
ناسيني خالص من استفتاءاتك
على العموم أنا كنت هاقول لك لا أعلم
وبكده هاكون أفتيت لأنه من قال لا أعلم فقد أفتى
ههههههههههههههههههههه
السلام عليكم
كان امتى الاستفتاء دة؟؟
للاسف الشديد بيتناسوا ان من قال لا اعلم فقد افتى دي مقولة مهمة جدا
العيب هو ان الواحد يسيب نفسه مش عارف
ربنا يعلمنا ما لا نعلم يارب
جزيت الخير
بس بجد هتفضل لحد الاجازة ما تخلص ما تدونش ليه بس كدة:(
تحياتي
أحمد بسيونى
تدوينة رائعة
وأوقات الفتوى بدون علم بتودى ف داهية
أنا مرة فضلت ألف حوالين نفسى ساعتين وأنا رايح أزور واحد فى مستشفى ما
عشان البهوات مكسلين يقولوا كلمة معرفشى
السلام عليكم شخصيا كلمة لا اعلم تريح ضميري كثيرا حين اقولها..صحيح فيه مواقف بتبقي في غاية الاحراج انك تقول معرفشي زي لو واحدة اصغر مني في الكلية سالتني في حاجة في منهجها المفروض اني درستها وطبعا مش فاكراها ..بقعد كتير افكر اتفزلك فيها وافسرها زي مفلسفتي بتقول ولا اقول معرفشي وصراع بين الحق والباطل...بس في الاخر بقول معرفش ..والحمد لله..
بس فعلا هي حاجة مش سهلة ابدا خاصة لو انت متعود انك البريمو بتاع العيلة او اصحابك ..
رزقنا الله علما نافعا ولسانا صادقا...
انت اتكلمت فى نقطة مهمة جدا جدا ...
وفكرتنى بمقوله جميلة
"من قال لا أعلم ..فقد افتى"
السلام عليكم
الوا
لا ارى انه من الاحراج
ان يقول الانسان
لا اعرف
ولا ادرى
خيرا من قولة ..وبعدها
لا يتحمل نتيجة كلامة
وفقك الله اخانا
تقبل مرورى
الم الجراح
يا راجل .. حد ميعرفش الجوزاء يعني ايه ؟
الجوزاء يعني ..
يعني ..
..
..
..
ممممم
بصراحة : مش عارف !
السلام عليكم
تدوينة مميزة يا دكتور ما شاء الله
بصراحة انا قلما بقابل حد بيفتي كده و خلاص عشان كده مكنتش متوقعة ان الموضوع منتشر كده
المهم ان فعلا زي ما حضرتك تفضلت
الكلام كده و خلاص بدون علم بيكون مش بس حرام عشان هو مثلا بيكذب او .. او
ده الموضوع بيدخل في اذية بني آدم بمعلومة ممكن تودي الغرب و هو عايز يروح الشرق
سبحان الله دينا مفهوش حاجة زيادة عل الفاضي
كل حاجة محسوبة
جزاكم الله خيرا
و على فكرة انا مكنتش اعرف يعني ايه جوزاء
بس فتحت المعجم
و مكتوب الآتي :
الجوز بفتح الجيم و الواو : من كل شئ وسطه
او هو خشب جميل المنظر لين يشيع استعماله في الأثاث
و جوز الهند
و الجوزاء : برج من أبراج السماء
و آخر كلمة ضحكت بصراحة عليها و ترددت اكتبها و لا لأ .. بس قلت اكتمالا لأمانة المعلومة بس و الله
الجوزة : ما يدخن فيها الطباق
و جزاكم الله خيرا
تحياااتي
وعندك حق
والله حاجة تجنن
كل واحد بيفتي
حتي الدين بيتفتي فيه
تحياتي ليك علي الموضوع
دمت سالما
احيي حضرتك علي التدوينة
فعلا من قال لا أعلم فقد أفتي
فكرتني تدوينتك بحوار الله سبحانه وتعالي مع الملائكة في سورة البقرة
أعوذ بالله من الشيطان الرجيم
وعلم آدم الأسماء كلها ثم عرضهم علي الملائكة فقال أنبئوني بأسماء هؤلاء إن كنتم صادقين
قالوا سبحانك لا علم لنا إلا ما علمتناإنك أنت العليم الحكيم
دمت بخير
تحياتي
طبعا الدنيا للأسف دلوقت ينتشر فيها نمووذج أبو العريف بشكل غير معقول
كله بيفتي .. و كله بيتكلم في حاجات مش فاهمها و لا يملك أي درايه بها
ربنا يحفظنا
فكرني كلامك ياأحمد بحديث الرسول صلي الله عليه وسلم
((سيأتي على الناس سنوات خدّعات، يُصَدق فيها الكاذب ويُكذَّب فيها الصادق، ويُؤتمن فيها الخائن ويُخوَّن فيها الأمين، وينطق فيها الرويبضة))،
قيل وما الرويبضة يا رسول الله ؟ .. قال: «الرجل التافه يتكلم في أمر العامة».
يعني أظن ده نموذج مشابه و أن كان مفهوم الرويبضه أعم
لك تحياتي يا أبو حميد
من قال لا فقد أفتى
بوركت
د/هيما
الدعوة لحظر الحزب الوطنى
لماذا لا نقوم بعمل حملة قومية من أجل حظر وحل ما يسمى بالحزب الوطنى
ولماذا لا نقوم برفع دعوى قضائية امام المحاكم المختصة
نتهم فيها الحزب الوطنى بأنه حزب يهدد الدستور ويعطل الدستور
وبأنه حزب يزور ارادة الشعب ويستغل ما لديه من سلطات ونفوذ من أجل البقاء فى الحكم لأجل غير مسمى
قد يقول قائل من الصعب أو من المستحيل أن يحدث هذا الأمر ومن المستحيل أن ننجح فى حظر الحزب الوطنى
وانا غرضى ليس حظر الحزب كأجراء قانونى .. وإن كان هذا ممكن .. ولكن غرضى هو مهاجمة هذا الحزب الفاسد الفاشى الفاشل المزور
مهاجمته قضائياً وشعبياً وإعلامياً
فلنتخيل سوياً هذا الخبر على صدر صفحات الجرائد وفى مقدمة النشرات الأخبارية
قوى حزبية وشعبية واعضاء معارضين بمجلس الشعب المصرى
يطالبون بحظر الحزب الوطنى الحاكم ومحاكمة اعضائه
انا مش بقول في امتحانات الشفوي غير كلمة معرفش
ادعولي اقول حاجة تانية غيرها
و على فكرة انا معرفش يعني ايه جوزاء
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
السلام عليكم اخي احمد والله الله يباركلك في مدونتك الجميلة وجزاك خيرا علي مجهودك العظيم ويجعله بميزان حسناتك
عندك حق فانا من برج الجوزاء وربنا يعلم اني مش وحشة صوابعك مش زي بعضيها والابراج محدش يعترف بيها لان فيه ناس بيدخل في تكوينها الوراثة والاكتساب من الناس والمجتمع والجينات والفطرة وغيره بس فيه مجموعات بيعملو عليها درسات نفس يوم المولد والتاريخ لذلك بيطلعو لنا المعلومات دي
د.احمد سعيد بسيوني..
انت بتضحك علينا ولا ايه ؟؟
فين يا عم تدوينة البيات الصيفي اللى انت قلت عليها ؟؟
منتظرينها يا جميل..
السلام عليكم
ربنا يبارك فيكم
المقال رائع
جزاكم الله خيرا
بالفعل هناك الكثيرون يتحرجون جدا من ان يبدى عدم علمه بأمر ما أيا كان الأمر
وخاصه مثلا فى امر معرفه الطرق والشوارع فيمكنك ان تسأل عن عنوان معين ستجد الكثيرون يجيبوك ولكن القليل منهم من يدلك على الاتجاه السليم
أما فى الموضوعات العاديه وغير العاديه ستجد الكثيرون يجيب كل الاسئله حتى ولو كان السؤال عن أمر متخصص طبيا مثلا أو فى أمور الفضاء
ربنا يكرمك
لكن صحيح هل الجوزاء هذه مختلفه عن الجوزه والشيشه
ربنا يبعدنا عن التدخين فهو حرام
مدونة رائعة جداولذيذة
مش عارف أقول تعليق ؟؟؟؟؟؟؟؟؟؟؟
بصراحه هيا مشكله فعلا وأعتقد إنها موجوده عندنا في مصر كتير حبتين
الكل عارف والكل مفتي
بس بصراحه رساله جميله
ربنا يبارك فيك
أخوك / محمد الدستاوي
http://engeldestawy.blogspot.com/
فعلا والله
كلمه لا اعلم ارحم مليون مره من اللي بيفتي عمال علي بطال
ربنا يرحمنا برحمته
جزاك الله خيرا
إرسال تعليق
<< Home