مدونــة البحـــر
الخميس، ٢٨ مايو ٢٠٠٩
ولاد البطة
بسم الله الرحمن الرحيم
..
.
ولاد البطة .. السودة والبيضة
**مشهد واحد**
لجنة شفوي .. في إحدى كليات الطب .. في إحدى الجامعات المرموقة
يدخل الطالب محمد اللجنة ، بينما يجلس الدكتور على الكرسي رافعاً رجليه على المكتب في وجه باب اللجنة
الطالب : السلام عليكم
الدكتور : اسمك إيه ياله
الطالب وهو يهم بالجلوس على الكرسي : محمد اسماعـ
يقاطعه الدكتور : أنا قلتلك اقعد
الطالب : أنا أسف يا دكتر .. بس
الدكتور : بس إيه ومابسش أية ، مش عاوز اسمع منك ولا كلمة ، اتنيل اقعد على الكرسي ، ولا تحب تيجي تقعد على حجري
يسكت الطالب تماماً ، مندهشاً من رد الفعل العجيب
الدكتور : ها .. اسمك أية
الطالب : محمد
الدكتور صائحاً وهو يشيح بيده : أنت هتنقطني ، اسمك بالكامل يا طالب
الطالب : محمد إسماعيل عبد الله محمود سمـ
الدكتور : خلاص ، كفاية ، هو أنا هاناسبك
الدكتور : قولي ياله .. تعرف أية عن الباطنة
يسكت الطالب برهة مستجمعاً ذاكرته ، ومصدوماً من السؤال الغير محدد المعالم ، ثم يردف : حضرتك الباطنة هي العلم الذي يعني بدارسة .......... ويكمل الطالب حديثه ، ويستمر في شرح الباطنة والتعريف بأقسامها المختلفة من قلب و صدر وكلية و و و و
يستمر الطالب في شرحه لإجابته ويستمر ويستمر ، بينما يجلس الدكتور مترصداً لأي خطأ منه كي يقوم بافتراسه
مرت نصف ساعة والطالب مستمر في حديثٍ وشرح ٍوإيضاح و
الدكتور مقاطعاً : خلاص يابني ، إيه ، أنت مابتزهقش ، بقك مابيوجعكش
الطالب : اصل حضرتـ
الدكتور : خلاص .. خلاص - قوم يالله ، مستواك مش بطال ، بس أبقى ركز اكتر في المرات اللي الجاية
يقوم الطالب وهو يتمم في نفسه : هو يقصد أية بالمرات اللي جاية !!! ويكتب الدكتور في كشف الدرجات للطالب محمد 76 من 100
يخرج محمد مندهشاً لما حدث معه في اللجنة ، وهو يضرب أخماساً في أسداس ومصدوماً مما حصل له
***
**مشهد اثنين**
نفس لجنة الشفوي ، في نفس الكلية ، في نفس الجامعة المرموقة
يدخل الطالب ميمي اللجنة مرتدياً شورتاً قصيراً اخضر اللون ، وتي شيرت احمر ضيق ، ومعلقاً سلسلة في رقبته وأخرى في يده ، بينما يقف شعره رأسه "اسبايكي" ، و تلوك لبانة كبيرة الحجم في فمه
الطالب : هاي
يعتدل الدكتور في جلسته : أهلا يا حبيبي ، أتفضل اقعد
- اسمك أية يا بسكوته
الطالب : ميمي
الدكتور للتأكد : ميمي أية يا حبيبي
الطالب : ميمي سعد مسعد المحظوظ
الدكتور : أهلا بيك يا عيوني
- بابا عامل أية
الطالب : كويس
الدكتور : وماما كويسة
الطالب : أه كويسة ، وبتسلم عليك
الدكتور : الله يسلمها
- أهلا بيك يا حبيبي
- قولي يا ميمي ، أنت مذاكر أية
الطالب : يعني ، شوية حاجات كده
الدكتور : زي أية يا حبيب ماما
الطالب : يعني ، ممكن بعض الحاجات اللي بتعمل هرش
الدكتور : طب ممكن تقولي بعضهم
الطالب : هو أنا مش فاكرهم كلهم ، بس تقريباً ممكن نقول أن الهدوم اللي مش مكوية كويس ممكن تعمل كده
الدكتور : برافو يا ميمي ، أنت هايل بجد
- طب وأية تاني
الطالب : مش فاكر
الدكتور : مش مهم خالص
- معلش أنا طولت وتقلت عليك في الأسئلة
الطالب : عادي ، ولا يهمك يا عمو
الدكتور : خلاص كده ، برافو عليك ، أنت حصلت على الدرجة النهائية ، بس ماتنساش تسلم لي على بابا وماما
الطالب : بيييس يا عمو
الدكتور : بيييس يا حبيبي
***
مع احترامنا وتقديرنا الكامل لمعظم الدكاترة "اساتذة الجامعات" ممن يؤدون واجبهم على افضل مستوى ممكن
مع احترامنا وتقديرنا الكامل لمعظم الدكاترة "اساتذة الجامعات" ممن يؤدون واجبهم على افضل مستوى ممكن
***
سيتم اختيار احسن التعليقات لتوضع في نهاية الفيديو المصور لهذين المشهدين .. في القريب .. إن شاء الله
***
هناك الجديد دوماً على مدونة .. سطر واحد
هناك الجديد دوماً على مدونة .. سطر واحد
14 Comments:
السلام عليكم و رحمة الله و بركاته
مش هعرف أقول أحسن تعليق لإنى بضحك
ههههههه
أضحك الله سنك ..
بس عندنا فى صيدلة على أيامى مكنش الوضع بالسوء ده ...
تقبل تحياتى
والله بيحصل الكلام ده .. وأكثر
ياما في الشفوي مظاليم
السلام عليكم و رحمة الله و بركاته
أيوا فعلا الكلام دا بيحصل
بجد حاجة تخنق
بس هأقول ايه ؟؟!!..
لا ماتستناش كلام
مش لاقية تعليق
دمت بود
أصعب حاجة على النفس فعلا هي الاحساس بالظلم,
والمواقف دي كانت بتتكرر عندنا في الجامعة وقدام عنينا,
كنت بقول لو خلاص زنقت معاهم خلوها في الدرا,
ليه صديقة بنت احد الاطباء المشاهير في احدى كليات القمة
في احدى الامتحانات الشفوي سالها الدكتور سؤال ماعرفتهوش فسالها سؤال تاني برضه ماعرفتهوش
فقالها الدكتور قولي يابنتي اسمك ايه؟
واول ماعرف اسمها قالها طيب يابنتي آدي الدرجة النهائية علشان خاطر الدكتور فلان والدك!!!
السلام عليكم
هي دي مصر
ولا عزاء للغلابة
طب دا كويس أوي، دا بيحصل نيل من كده، محتاجه مدونه +18 لشرحها.
إذا كان رب البيت بالدف ضارب.....؟
WHAT A CORRUPTION !!
Any how
Do your best and study well
go ahead
you will succeed
God willing
Not their willing
السلام عليكم ورحمة
الله تعالى وبركاته
يضاف الى مشاهدك هذه
مشهد (الامورة) الطالبة
ممن يستخف ظلها وشكلها الممتحن
فيتفضل عليها بالمديح والثناء والاسئلة البسيطة وبعض البسمات
ثم يعطيها النمرة النهائية لانها
ببساطة شديدة:جميــــــــــــلة!!
المشهد المضاد له
اقلب انت كل ما سبق
ذكره وستعلم النتيجة
دون ان اقولها انــــا:(
السلام عليكم / موضوع صعب ومستفز جداً عافانا الله جميعاً من الظلم والظالمين والنفاق والمنافقين .
ولكن أن يتعامل أطباء المستقبل بهذه الطريقة هو فساد وإنحطاط ومأساة بحق .
حفظكم الله يا شباب الأمل والمستقبل المضىء من كيد الكائدين وفساد الفاسدين آمين .
الأخ الفاضل :: أحمد سعيد بسيوني ::
السلام عليكم ورحمة الله
ما شاء الله الفكرة رائعة
والحوار أروع - ضحكت كثيرًا ^_^
هذا التمييز هو أساس ودعامة لتردي أوضاع الأمة ..
فمن هذا المنطلق يتولد لدينا دكاترة لا تدري ماذا يرضيهم ؟؟
وإذا كان التقويم للطلاب معتمدًا على الجنس أو اللون أو العرق أو المال أو حتى المذهب الديني - فالدين جانب والعدل في توزيع الدرجات جانب آخر -
إذا كان الأمر كذلك فقل على الدنيا السلام .
تحياتي
بسم الله الرحمن الرحيم
اما عن المشهد الاول
ممكن فعلا يحصل بالنص بس اعتقد نسبة حدوثة صغيره جدا بس للاسف بتحصل بس برده لايجب ان نغفل دور ومدى مصداقيه وعدل معظم الاساتذه فى قسم الباطنة او غيره من الاقسام
كان المفروض التنويه على الجيد كما ركزتم على الردئ
اما عن المشهد الثاني
انت تحاملت اوى يااحمد على الطالب فى وصفك له
وبرده وصفك للدكتور هنا وحديثهم قلما يحصل بنسبة قليلة جدا
لكن برده بيحصل
عموما انا برده عايز اقول ان انا لو عامل اللى عليا اكيد هاخد حقى بشكل او باخر
وعايز افرق بين نقطتين مهمين اوى فى لجان الشفوى
فرق كبير اوى بين دكتور اسئلته صعبه جدا ودكتور بياخد بالكوسة
مجملا انا شايف مهما حصل ان تناول الاصلاح ميبقاش زى مانت عرضته
ياريت ياجماعه اللى يقول ان بيحصل فى الشفوى اكتر من كده فى الكوسه يقول برده نسبته للعدل والاحترام كام لكام
يمكن انا غلطان !!!!!
لك منى خالص الود ولا تنسانى من دعائك
حلم كبير
السلام عليكم ورحمة الله وبركاته
نتمني منكم زيارتنا للضرورة
هذا التحديث مهم للغاية نتمني متابعة هذا التحديث وفي أقرب وقت للأهمية
مفاجأة في هذا التحديث
لو نهر النيل بقى صلصه مش هيقضى الكوسه اللى فيكى يا مصر
---
فى انتظار الفيديوهات
إرسال تعليق
<< Home